話說阿史前幾日突然諗起好耐無食過豆豉鯪魚炒油麥菜，於是就去超級市場買返罐吔下。唔知係咪太耐無買呢款罐頭，喂喂！咁貴嘅，明明以前阿媽為慳家先食嘅咋喎....
講到豆豉鯪魚，相信史友們都會幫襯鷹金錢呢個牌子，原來睇返歷史，呢間廠曾經係亞洲規模最大嘅罐頭廠。今時今日嘅鷹金錢，前身係廣州鷹金錢食品廠，早於十九世紀嗰陣，呢間公司嘅前前身叫做廣茂香罐頭廠，呢間廠厲害喇！响1893年發明咗遠近馳名嘅豆豉鯪魚罐頭。由於當時好多廣東男人出洋打工，食到一罐豆豉鯪魚足夠解一時鄉愁，慢慢成為咗廣東人同海外華人嘅美食。
到咗1956年，國家實行公私合營，將多個廣州罐頭廠同牌子合併以及收歸國有，廣茂香罐頭廠同其他廠合組成為廣東罐頭廠，1958年廣東罐頭廠落成投產，成為咗當時亞洲最大嘅罐頭廠。呢個廠係由蘇聯專家參與興建，廣東嘅水產、水果都成為罐頭製作嘅食材。
至於呢個罐頭廠，因為現代化生產關係响2008年停產遷出，現時舊廠房就被活化成文創產業基地。
原圖嚟自網絡