之前阿史介紹過早响隋唐時期，因為海外貿易發達關係，所以就有好多外國人响廣州生活，廣州仲出現呢啲外國人住嘅區域蕃坊。話時話，當時呢啲外國人都相當融入响中國嘅生活，甚至有講法話有阿拉伯人後裔做埋皇帝添。
呢個皇朝就係五代十國中嘅南漢。最早提出呢個講法嘅係日本學者藤田八豐，佢响著作《中國南海古代交通從考》中就提出南漢皇族劉氏同黃巢、蒲壽庚等人一樣都是大食人，即阿拉伯人。咁佢有乜憑據呢？佢响一啲民間著作當中就搵到一啲證據，好似宋《北夢瑣言》記載，北方貴族韋宙準備將侄女嫁俾南漢代祖劉謙時，韋宙家人曾以劉謙「非我族類」為由加以阻攔，呢個「非我族類」可能就證明咗佢唔係漢族人。另外，响清代《南海百詠》同《恭岩扎記》記載，工匠為南漢後主劉鋹曾為本人同佢個仔塑銅像，而銅像面目可憎俗稱「番鬼是也」，番鬼可能就表明佢哋唔係漢人咁嘅樣。另外，宋代《萍州可談》記載，唐代廣州藩坊有一劉姓胡人娶咗宗女。以上種種證據令藤田八豐判斷南漢皇族唔係漢人，同廣州蕃坊劉氏又可能有關係，因而推斷佢哋係大食人後裔。
不過，有學者就對藤田八豐嘅講法有所保留，好似阿拉伯人主要信奉伊斯蘭教，但南漢皇族係信佛教，另外，「非我族類」呢個講法唔一定話劉氏一族係阿拉伯人，有可能係當時南蠻傜族之類。
原圖嚟自網絡