繼續同史友們介紹我國最新嘅考古發現，近日國家文物局就喺北京召開「考古中國」重大項目嘅進展工作會，其中就通報咗一項位於北京市區嘅考古工作，就係喺豐台新宮發現嘅一處重要大坨頭文化遺址。
新宮遺址位於北京市豐台區南苑街道，係燕山南麓古永定河流域沖積扇平原。原本為咗配合基本建設發展，北京市考古研究院就對呢個地段進行工程前嘅勘探，但點知竟然發現到多達三百個唔同時期嘅遺跡，由夏商周時期聚落及墓地，兩漢墓葬、遼金道路、明清灶址及道路等都一應俱全。
而當中最重要嘅就係夏代晚期至早商時期遺存，呢個時期嘅遺存都係屬於大坨頭文化，整體就係由聚落區以及墓葬區組成。聚落區當中，考古團隊就首次發現到有內外雙重環壕圍合，圍合面積約4000平方米，當中仲有灰坑、窖穴、房址、墓葬等遺蹟，出土咗唔少陶片、石器、獸骨等。
呢次發現係北京地區首次發現嘅大坨頭文化雙重環壕聚落，延續時間長，遺跡遺物豐富，係相當重要嘅一次考古發現！
原圖嚟自網絡