我國葡萄酒業早喺漢武帝時期開始？

近年嚟國產葡萄酒業接連喺國際比賽當中取得大獎，而數國產嘅葡萄酒就以寧夏賀蘭山最為突出。雖然葡萄酒係近年嚟我國嘅新興產業，但中國釀造葡萄酒嘅歷史絕對唔短，早喺漢武帝時期就已經開始！

釀造葡萄酒最主要就係要有葡萄，而我國嘅歐亞種葡萄就係喺漢武帝建元年間，由張騫出使西域時（西元前138-前119 年）從大宛（中亞塔什干地區）帶返嚟。喺《史記•大宛列傳》當中就有記載，「宛左右以蒲桃為酒，富人藏酒至萬餘石、久者數十年不敗」，可見呢個地方當時就以葡萄酒聞名，而呢個地區嘅葡萄品種亦都係優良。

喺得到咗歐亞種葡萄種之後，就係要種植葡萄。《太平御覽》就有提及漢武帝時期，漢武帝係會親自「離宮別觀傍盡種蒲萄」，呢一點就確保咗古代中國嘅葡萄產出。而之後最重要嘅一步就係要學識釀酒，《史記•大宛列傳》當中，仲有講到張騫喺引進葡萄嘅同時，亦都招來釀酒藝人，喺漢代嘅時侯葡萄酒種植以及釀造都已經到達一定嘅程度，後來仲傳播到新疆、西安、華北等地區，可見我國葡萄酒業喺漢代時候就已經建立。