今日本港體育界就傳來一則令人震驚嘅消息，就係曾經兩度喺奧運上為香港爭取到獎牌嘅「牛下女車神」李慧詩就確定唔會出戰今年九月嘅杭州亞運，並且自己亦都會正式退役，36歲嘅佢未來就或者會轉任香港單車隊嘅教練。
李慧詩喺2004年成為全職運動員，喺牛頭角下邨成長嘅佢自幼就曾經患上貧血、經歷過跌斷手、手術失敗等情況，差啲就無法開展運動員生涯。但喺過程中佢一直堅持夢想，不斷克服各種苦楚，最終就喺2010年廣州亞運500米計時賽先為香港奪得呢個賽事第一金並且刷新亞洲紀錄。而喺2012年倫敦奧運，佢就喺奧運女子競輪賽衝得一面銅牌、2021年東京奧運女子爭先賽再度奪得一面銅牌，成為港人心目中嘅「牛下女車神」。而喺佢生涯當中，佢仲曾經20個月未嘗一敗，將生涯擁有的彩虹戰衣一口氣增至3件，係香港首位做到呢個壯舉嘅單車運動員。
李慧詩感謝廣大市民對佢一直以嚟嘅支持，並希望未來繼續可以成為一個幫助回饋港隊嘅人。
原圖嚟自網絡