一連三日嘅「家鄉市集」圓滿落幕，超過200個攤位集合咗26個省份嘅家鄉特色乾貨、地方小吃美食等，吸引咗大量市民前往掃貨「打卡」。而除咗呢啲特色乾貨之外，呢個市集上仍然有唔少亮點，其中一個就係連保安局局長鄧炳強都去親自敲響祝願國泰民安嘅「戰國曾侯乙編鐘」複製品。
喺湖北社團總會嘅市集上，就展示咗一個一比一還原、現藏於湖北省博物館的戰國曾侯乙編鐘嘅複製品。戰國曾侯乙編鐘係喺1978年喺湖北省曾侯乙墓出土，係迄今已發現嘅古代編鐘中數量最多、規模最大、保存最好、音律最全、音域最廣嘅樂器。
喺發現編鐘之時，呢套編鐘就已經被泥水浸泡，但形態就大致保持到下葬時嘅情況。曾侯乙編鐘共65件，由於45件甬鐘上有銘文「曾侯乙乍𠱾」，所以就以曾侯乙編鐘命名。曾侯乙編鐘數量龐大，完整無缺，如果由長短不同嘅兩面木架垂直相交組成，就需要用到8根圓柱承托住整個編鐘，形成上、中、下三層，而鐘架及掛鈎就有246個，真係相當誇張！
呢套編鐘嘅存在亦都證明早喺我國戰國時期，就已經有七聲音階以及絕對音高嘅概念，亦都反映周代嘅文化及科技已經到達一定水平。
原圖嚟自網絡