唔知史友們有冇幻想過只係用上幾十萬港幣就可以成為一個城堡嘅主人?相信大家聽到呢個消息都唔多相信，但實情近日喺蘇格蘭一座孤島之上就真係有一座咁樣嘅城堡放售，之不過以呢個價錢買得城堡之後，買家就有一個義務需要履行，阿史今次就同大家講一講啦！
據《BBC》報道，近日蘇格蘭一個孤島之上、具有二百年歷史嘅城堡布勞山莊（Brough Lodge）就以3萬英鎊（約29萬港元）價格出售，呢個誇張嘅定價甚至仲比當地平均房價仲要低。聽到呢個數目之後，精明嘅人都會知道背後一定有其他條款，而今次呢場買賣涉及嘅重要條款就係，買家必須負起保育及翻新工作，涉及金額或高達1,200萬英鎊。換言之，即係要以3萬英鎊買到城堡，就至少需要有1,200萬英鎊以上嘅身家。
布勞山莊位於蘇格蘭泄蘭群島（Shetland），城堡本身佔地約16公頃，據講係由一位1820年遊歷法國、瑞典及意大利嘅商人根據佢旅遊期間嘅見聞而建造。而自商人後代逐漸遷出，城堡於1980年代起一直丟空。城堡外觀及設備與一般城堡無異，設有塔樓、大型中庭及花園，以往一直都係由志願者營運修復，直到近期布勞山莊先至希望覓得企業家將城堡改建成世界級度假村。
原圖嚟自網絡