繼續同史友們介紹世界各地最新嘅考古發現,早喺今年四月日本九州佐賀縣神崎市吉野里遺迹發現一座石棺墓,隨即就引嚟日本民眾嘅熱烈關注。直至今星期初,考古團隊先至正式對石棺內部進行詳細調查。
據了解,呢座石棺長約2.3米,一共有四個石蓋並列,初步推測就係屬於彌生時代後期後半段到結束期,即2世紀後半葉至3世紀中葉前後。石棺發現嘅地點位於一座山頂,石棺蓋頂部亦都有唔少十字形嘅線條,反映石棺嘅主人極有可能係當時嘅權貴者。
而由九州北部出土嘅彌生時代古墓進行分析,呢個時期嘅古人都流行將鏡作為陪葬品,佢哋亦都認為十字線條就同鏡一樣,都可以起到驅邪嘅作用,所以呢種線條都經常會喺墓中被發現。石棺所在嘅位置同時亦都係神社區域,所以一直都冇被發掘,但直到神社去年搬遷之後,呢個「謎之區域」先至重現人間,亦令日本方面首次發掘到彌生時代後期權貴墓葬。
原圖嚟自網絡