最近响網上見到個帖，話香港灣仔以前有發電廠，阿史好耐之前都介紹過係响日月星街一帶。咁响十九世紀末二十世紀初個陣，作為當時廣東最繁榮富裕嘅廣州市，幾時開設有電力供應呢？
廣州最初有電力供應記錄，係响1888年。當時清光緒十四年(1888年)，兩廣總督張之洞從外國購入一部發電機以及100盞電燈，以供總督府衙門內照明用。過咗兩年後就有美國華僑集資開辦咗廣州電燈公司，向廣州市部分地區供電。之不過，呢間電燈公司只係得幾部舊發動機組，發電量唔算太大，不過以當時能夠供1500盞電燈照明用嘅電力已經好勁。可惜營運成本太大，响九年後執笠收場。
1900年，英商旗昌洋行就响廣州長堤五仙門開辦粵垣電燈公司，建立咗五仙門發電廠，以四台發電機展開電力事業，後嚟廣東省政府收購咗呢間公司，成立廣東電燈股份有限公司，有咗龐大資金就添置更多發電機組，因而供電業務得以擴展。所以有廣州研究學者就認為，五仙門電廠出現先係廣州正式有正規電力供應嘅開始。
原圖嚟自網絡