早兩日阿史陪波士去咗深圳傾生意，阿史諗諗下好似十幾年無去深圳。坐响的士裡面望出去，嘩！深圳嘅繁華程度基本上同香港無乜分別。唔怪之後咁多香港人鍾意上深圳吃喝玩樂。

深圳之所以得以走向繁榮，主要係受惠於改革開放政策。文革結束同鄧小平掌政後，中國可開始落實改革開放政策。1979年，中共中央同國務院同意响廣東省嘅深圳、珠海、汕頭，連同福建廈門市試辦出口特區，後尾改稱為經濟特區。1980年3月，全國人大常委會正式批准設立深圳經濟特區。簡單而言，深圳市就係响呢個時候發展起嚟。

深圳嘅經濟之所以得到發展，其實係同香港有密切關係。配合改革開放政策，深圳市政府對港資企業提供好多優惠。當時香港嘅工廠面對經營成本不斷增加，於是北上到深圳開廠。大家可能唔記得，當時深圳係被打造為旅遊城市，唔少香港人都會去深圳玩，阿史細細個嗰陣就曾經去過香蜜湖同西麗湖喇！之後深圳仲起埋世界之窗、錦繡中華等景點，亦由於深圳物價低，港幣兌換人民幣嘅匯率高，所以好多香港人都鍾意上去玩。

30年過後，深圳比改革開放初期已經有翻天覆地嘅轉變，睇返啲相真係唔相信以前深圳係咁樣。不過，阿史今次上去發現唔係好多深圳嘅人識講廣州話，因為阿史食飯落單個陣，溝通上有啲困難，哎呀！

圖片來源：網絡