上次講到印尼嘅歷史，今日就帶大家返到現代，研究吓當地有咩特色景點。要認識歷史文化，阿史一於帶大家暢遊古城日惹，欣賞吓自然風光同歷史遺跡。

要講歷史名勝，肯定要提東方四大奇跡之一嘅婆羅浮屠。婆羅浮屠被列入世界文化遺產名錄，係世上最大嘅單體佛教建築，有指1006年火山爆發，令婆羅浮屠被埋响火山灰下800年。到今時今日，每年都有好多遊客去參觀同睇日出，阿史上年去完，司機哥哥講明要凌晨三點集合再開車入去，聽到阿史眼都凸，即係唔洗瞓？！不過最後見到個鹹蛋黃，都值得嘅。

睇完日出，阿史同大家去參觀豪宅——蘇丹王宮。蘇丹王宮有近250年歷史，响印尼獨立後，政府繼續允許原王族居住，入面嘅僕人仍然著住傳統服裝。去王宮參觀，話唔定有機會見到蘇丹架。

去過歷史景點，等身為年輕人嘅阿史同大家去探險，尋找「天堂之光」。日惹近年有唔少新興景點，中岜朗天坑係其中之一。天坑其實係因為幾千年前嘅地質運動所形成，天坑上方有個窿，每日中午一段短時間內，當太陽去到合適位置，天坑頂部就會出現集中嘅光束，投射到黑暗洞穴嘅底部，因此又被稱為「天堂之光」。點先去到？要垂降吊落去？阿史腳軟添……