哥倫布發現新大陸,被公認為偉大嘅航海家,回望中國歷史,七次下西洋嘅鄭和,其實仲早過哥倫布。鄭和航程遠至東南亞、印度洋、波斯灣、東非海岸諸國等等,涉及56個國家同地區。鄭和嘅七次航程入面,有6次都去咗或經過爪哇國。佢第一次仲出師不利,被爪哇國殺咗百多個船員,究竟當時發生咩事,雙方又點拆彈?

明朝永樂三年,鄭和受命第一次下西洋,其中一個地方,就係爪哇。爪哇以前叫闍婆,即係今日嘅印尼中部嘅爪哇島,主要城市雅加達、萬隆、日惹等等都响島上。當地係南洋要塞,人口稠密,物産豐富,商業發達。

爪哇島當時有個麻喏八歇國,東王同西王打緊仗。東王戰敗,屬地被西王軍隊佔領。鄭和船隊嘅人上岸到集市做生意,被誤以為係東王嘅援軍而遭誤殺,多人喪命,鄭和嘅手下紛紛要求宣戰報復。

不過,鄭和身負皇命,佢知道一旦大開殺戒,沿路西洋各國就會質疑明朝航行嘅目的,於是同皇帝稟明,希望化干戈為玉帛。至於西王,發現殺錯人之後梗係好驚青,最怕明朝派兵,於是立即派使者去北京謝罪。明朝要求賠償六萬兩黃金,點知爪哇個邊無錢、還唔起,明朝之後放棄追數,兩國自此和睦相處。

今時今日,印尼旅遊業蓬勃發展,除咗峇里島,其實日惹都有好多出名嘅景點,包括婆羅浮屠同蘇丹王宮,而部份新興景點更加吸引唔少年輕人去添,絕對平靚正,有機會再同大家講講。