喺48年前嘅5月17日，薄扶林龍虎山發現兩具一男一女嘅屍體，二人係情侶關係。當時警方發現佢哋被反綁，並且被勒死，而女死者衣服遭扯開同露出下身，警方一度以為係姦殺案。但驗屍之後證實，女死者無被強姦，但胸部有牙齒印，相信曾經被非禮。

男死者生前係中學老師，女死者係師範學院學生，遇害當日係女仔嘅生日。據講，警方初時對案件無乜頭緒，但後來發現兇案現場附近一個月前發生過一宗非禮案，犯案手法相似，當時受害人透露過色魔嘅特徵，然後警方循呢一啲線索，最終拉到個殺人兇手。同兇手相熟嘅人認為兇手有一種病態，見到男女有親熱行為就會好憤恨，同埋舉止失常。審訊期間，警方證實兇手精神有問題，結果佢被送到青山精神病院。

許鞍華執導嘅處女作《瘋劫》，電影內容正正就係改編自龍虎山雙屍案，由趙雅芝、萬梓良、張艾嘉等等演員出演。