作為古代絲綢之路嘅必經之處，現今新疆呢個地方响二千幾年前已經相當繁榮。以前讀中史個陣，記得交通史就講過當時中原挖井技術轉至西域，令西域部分土地變得肥沃，呢個就係坎兒井技術喇！不過，對於坎兒井係唔係中國原創，其實係有爭議。

乜嘢係坎兒井呢？坎兒井係荒漠地區一特殊灌溉系統，由豎井、地下渠道、地面渠道同澇壩四部份組成，將地下水匯聚入井底，令暗渠引到地面。由於有暗渠保護，所以啲水就唔會咁易蒸發同俾風沙污染。

响漢朝時，中國人就有類似坎兒井嘅挖井技術。《史記·河渠書》有載：「武帝初發卒萬餘人穿渠，自徵引洛水至商顏下。岸善崩，乃鑿井深者四十餘丈，往往為井；井下相通行水，水頹以絕。商顏東至山嶺十餘裏間，井渠之生自此始。」而國學大師王國維就响《西域井渠考》就引用古籍文獻，歸納出坎兒井挖井技術應該嚟東方做生意嘅商人傳到西域以及中亞等地。

另一個講法，係話坎兒井係由波斯地區，傳入中亞以及西域地區。有外國學者响研究就話，坎兒井嘅形制結構、挖掘方式等都同中亞地區嘅karez相似，而karez又係由古波斯地區傳入，懷疑此法最早源於波斯，再東傳至西域。而响八十年代，有考古學家就發現新疆一啲石刻，發現一啲類似坎兒井嘅記錄，所以有人就相信坎兒井係以前响西域生活嘅人因地制宜而創造出嚟嘅。