早兩日深圳市政府公佈咗首批歷史建築名單，不過就引起咗好大爭議，因為唔少建築物本身落成嘅時間好短，難言係「歷史建築」。深圳當局就話，挑選近代建築原因係因為「深圳作為改革開放的排頭兵與試驗田」，部分建築又係改革開放嘅一大標誌，所以具有歷史意義喎。

响呢個名錄當中，有一幢建築可以話深圳一個重要地標，就係國貿大廈。位於羅湖區嘅國際貿易中心大廈，於1982年動工、1985年落成，係深圳市一座摩天大廈，當時甚至有中國第一高樓嘅美譽。作為經濟特區嘅深圳，被視為全國改革開放嘅指標，亦因為吸引咗香港資金同技術，所以發展速度好快，當時更有「三天一層樓」嘅講法，而國貿大廈就係當時一個指標性建築，連鄧小平南巡都要去睇睇。


時至今日，國貿大廈已經唔再係深圳第一高樓，但呢幢大廈响深圳市民心目中有著好特別地位。