今日阿史介紹嘅呢個地方,係最近進入咗阿史視野範圍內,至於點解就到文章最後先介紹一下。

阿拉山口係位於新疆嘅對外陸路口岸,亦係中國通往中亞、歐洲嘅鐵路口岸,係現時「一帶一路」戰略當中重要嘅貨物集散地。其實,呢個位於哈薩克同中國邊境口岸,自然環境其實唔多好,因為呢個地方一年三百六十五日都會刮風。而响歷史上,呢個地方一直唔係人口稠密嘅地方,响民國時期就曾經設立過關卡巡邏邊境。不過到咗上世紀四十年代,蘇聯軍隊就進入阿拉山口地區,仲自設國界標誌;1944年,蘇聯乘中國邊卡撤銷之際,乘機控制呢個地區。到咗五十年代,中蘇兩國鐵路部門就計劃興建鐵路,但由於中蘇交惡令計劃擱置。直到上世紀八十年代,中蘇關係緩和,呢段從阿拉山口接通外國嘅鐵路先得以興建,依家阿拉山口亦成為通往中亞重要嘅鐵路口岸。


好喇!介紹咗咁耐,點解要講呢個地方?就係最近阿史得知有個考察團會去北疆,阿拉山口就係其中一個考察地點,唉!十五十六,唔知去唔去好。