上星期講到永安百貨嘅創辦人郭樂同郭泉,今次同大家講講郭泉個仔郭琳爽。唔好以為佢係富二代就淨係識歎世界,永安嘅禮券、好似依家信用卡咁嘅VIP簿仔、代客送貨服務,都係郭琳爽所創,成功除咗靠父幹,都要靠自己先可以更進一步。

郭琳爽從歐美做商業考察之後,去過香港嘅永安百貨任職,之後1929年被安排到上海永安擔任副總經理,幾年之後,佢成為上海永安話事人。究竟郭琳爽點帶領永安更上一層樓?簡單嚟講,靠食腦。佢諗到計仔,客人可以憑住「簿仔」購物,先取貨,然後到端午、中秋同過年時結算,用類似信用卡同VIP嘅方式留住忠實同高消費力嘅顧客。據講到1935年,依類VIP嘅消費額佔成間公司五分一嘅營業額。

收到嘅禮物唔啱心水,相信唔少人都試過,郭琳爽因此發明咗「禮券」,憑票可以到永安挑選同等價錢嘅商品。根據其中一年嘅統計,用禮券換貨嘅金額達到三十幾萬,其他百貨公司雖然都跟住發行禮券,但始終唔及永安。

有次郭琳爽買禮物,叫職員幫手送畀朋友,之後職員話收到封跑腿利是,令郭琳爽靈機一觸,推行代客送禮,買嘢仲有九折添,其實係變相將收禮人所畀嘅跑腿利是(約等於禮物嘅十分一價值)預先返還予顧客。依招高呀,令永安業績蒸蒸日上,真係唔到你唔服。

工作以外嘅郭琳爽,原來好中意唱戲,佢仲成立唱廣東戲嘅「永安樂社」,排一個劇目多數要成三個月以上,之後會好似其他劇團咁演出。一有郭琳爽演出嘅劇目,唔少人都會買飛去望望永安百貨話事人嘅風采,搞到票價有時仲高過名伶梅蘭芳嘅演出。晚年嘅郭琳爽話,「人生等於戲劇,世界一切,都是戲劇化而已」。