抗日戰爭時期,共產黨領導嘅主要抗日根據地有19個,而東江抗日根據地係華南敵後最早建立嘅抗日根據地之一。資料記載,東江縱隊成功响日本侵略者嘅魔爪下解放大片中國國土,更先後建立七個縣級政府同一批區、鄉抗日政權。東江縱隊入面,有一位令日本侵略者聞風喪膽嘅「華僑將軍」,佢就係曾生。

據《寶安縣誌》和《曾生回憶錄》所載,曾生1910年生於今日深圳坪山新區,父親係香港海員,其後去澳洲當華僑工人,所以曾生年紀輕輕就先後到過香港同澳洲讀書。到1929年,曾生跟家人回廣州求學,其後响1938年抗日戰爭爆發後,到坪山組建抗日遊擊隊。

曾生1943年成為由廣東人民抗日游擊總隊改稱嘅東江縱隊司令員,八年抗戰期間,東江縱隊一共殲敵9,000多人,全隊更發展到逾1萬多人,由於戰功顯赫,曾生响抗日戰爭結束、日軍正式投降後,獲上級指定為接受在廣東日軍投降嘅中國代表。

一生為國為民,曾生最為人知嘅戰役,要數1941年6月「百花洞戰鬥」。佢當年率3個中隊及自衛隊約1,000人,與裝備精良嘅600多名日軍激戰兩日,成功將日軍大隊長長瀨擊殺,另擊斃或擊傷50多名日軍。在粵日軍首腦事後哀嘆:「這是進軍華南以來最丟臉一戰!」