唔知大家有冇去過深圳嘅主題公園玩呢?錦繡中華、民族文化村、世界之窗、歡樂谷等等,都係深圳市出名嘅旅遊景點。其中世界之窗阿史細個去過幾次,入面展示咗130幾個世界各地縮微版著名景點,2011年深圳主辦嘅世界大學生運動會仲响果度舉行閉幕禮,成為首個舉行世界大學生運動會閉幕禮嘅主題公園。

曾幾何時,中旅社响香港嘅電視頻道度,幫呢幾個景點大賣廣告,而呢幾個景點都係深圳華僑城集團經營嘅,所以話深圳華僑城都可以講得上係改革開放嘅成功典範。咁究竟當初嘅「華僑城」係點嚟嘅呢?

深圳華僑城本嚟係寶安縣光明華僑畜牧場嘅沙河分場,總面積有成12平方公里咁大,之後喺1981年改為沙河華僑企業公司。當時嘅全國人大副委員長廖承志,就提議將深圳沙河華僑企業公司升呢,變直屬國務院僑辦,令佢起到一個窗口嘅作用,用嚟吸引華僑投資,同時吸引人才嚟深圳發展,令沙河華僑企業公司成為落實華僑政策嘅基地。不過,呢個提議就引來深圳官員嘅微言,果陣嘅深圳市委書記梁湘就擔心會喺深圳特區入面多咗個「小特區」,當然,最緊要係因為冇得到國家計委嘅批准同撥款,令到呢個計劃暫時擱置。

後嚟廖承志响1983年逝世,中央就任命全國人大副委員長葉飛嚟接任僑務工作,葉飛提出採用交通部利用香港招商局嚟開發蛇口嘅方式同經驗,由國務院僑辦直屬嘅香港中旅集團去負責投資、開發沙河工業區,咁就可以喺解決資金問題嘅同時,又圓咗廖承志希望吸引華僑回國投資建設嘅一個心願。葉飛為呢個地方同企業改咗一個新名,就係華僑城喇。終於喺1985年,由國務院僑辦同埋國務院特區辦聯合發文俾廣東省政府,正式同意成立「深圳特區華僑城」。

講講吓,搞到阿史都想去深圳玩吓添…