香港同深圳距離咁近，加上宜家交通又咁方便，好多香港人周不時都會北上消費（食嘢、行書城、按摩之類），不過香港同深圳嘅關係又點止咁簡單，深圳可以由原本得一、兩萬人口嘅荒蕪城市，變成宜家人口超過一千萬嘅經濟特區，香港都有一份功勞。

自從1978年中央政府落實改革開放政策之後，廣東省成為最早開放嘅省份之一。當時中央同地方政府都決心要改革，想推動經濟發展同埋國家現代化，但實情係，無論係資金、技術同人才都非常缺乏。好彩，有一班香港人無私咁係粵港兩地奔波，協助祖國現代化。

喺1979年，香港一班來自法律、會計、工程、測量等界別嘅專業人士，喺廖瑤珠律師帶頭之下，組成促進現代化專業人士協會（簡稱四化會）。呢批嚟自香港各行各業嘅專業人士，自己拎錢出嚟做旅費、印講稿，北上為內地官員講解香港嘅專業制度、技術、相關嘅法律同埋政府政策。由於當時香港嘅專業同學術界人士都唔係好想去大陸交流，所以呢班肯自費北上嘅四化會成員就顯得更加難能可貴。

而當時北上嘅四化會成員當中，就有現任全國政協副主席梁振英。梁振英果時係蛇口工業區技術幹部第一期培訓班嘅義務老師，深圳果陣嘅條件好差，路面都仲未鋪好，由羅湖搭車去蛇口要成個幾鐘。蛇口每日中午仲會敲鑼炸山，又吵又大塵，連上堂用嘅班房都只係工業區內一間冇冷氣嘅石頭屋，遇著夏天果陣，無論係講書嘅，定係聽書嘅人都係大汗疊細汗。

喺改革開放初期，啱啱成為經濟特區嘅深圳其實响好多方面都係借鑑香港。深圳政府為咗制定深圳市首個城市規劃，曾經向香港土地、城市規劃等方面嘅專業人士徵求建議。梁振英曾經講過，佢哋呢批專業人士利用空餘時間上深圳幫手做城市規劃，將香港嘅經驗帶返去內地。所以，深圳宜家可以咁繁榮，香港功不可沒。