自從美國喺1945年向日本廣島同長崎分別投下原子彈之後，全人類都見識到原子彈嘅巨大威力。去到1964年今日，中國第一顆原子彈喺新疆羅布泊試爆成功，成為繼美國、蘇聯、英國、法國之後，全球第五個擁有核武嘅國家。

二戰之後，中國開始意識到：為咗唔好俾人蝦，自己都要有核武器。後嚟蘇聯領導人赫魯曉夫到訪中國，毛澤東直接問赫魯曉夫可唔可以為中國研製核武器提供援助。1957年10月，中國同蘇聯經過多次談判協商，正式簽訂國防新技術協定。蘇聯會向中國提供原子彈嘅教學模型同圖紙，仲會派專家嚟中國協助研製。

兩年之後，蘇聯真係派出專家到中國，但呢啲專家對原子彈技術隻字不提，仲從來都唔俾中國人接觸關於原子彈嘅資料。1960年，蘇聯認為中國發展核力量會影響自身地位，於是撤走晒喺中國嘅全部專家，帶走晒全部重要資料，連研究設備都停止供應。中國決定自力更新，研發原子彈。結果，喺著名物理學家鄧稼先等科學家嘅努力下，中國第一顆原子彈成功爆破。

由於核武器嘅破壞力實在太大，1968年7月1號，由英國、美國、蘇聯同其他59個國家簽署《核不擴散條約》，防止當時擁有核武器嘅國家向其他國家直接或間接擴散核技術、轉讓核武器。