宜家香港人想返深圳有幾個口岸選擇,可以經羅湖過關,又可以係福田北上,搭直通車喺皇崗返去亦得,真係夠晒方便快捷。而大家最常用嘅羅湖口岸,唔單止係中國境內最早實行聯檢嘅口岸,仲係中國陸路出入境客流量最大嘅口岸。呢座外形仿照北京天安門城樓設計嘅深圳聯檢大樓,喺1985年先落成,咁喺座大樓落成啟用之前,香港人係點樣返深圳嘅呢? 

香港企業家胡應湘係最早返大陸投資嘅港商之一,佢當初去大陸考察嘅時候經羅湖口岸過關,由香港落車之後,要拎住行李行300幾米排隊過關,平日都好啲,遇著節假日更加擠迫,等成幾個鐘先過到關好平常。胡應湘過到深圳果陣已經又餓又累,所以佢深深感受到羅湖口岸設施嘅簡陋。而隨住羅湖口岸嘅客流量與日俱增,當時嘅口岸設備已不足以應付龐大嘅人流。於是,喺一次中央領導接見嘅機會底下,胡應湘提出興建羅湖口岸聯檢大樓嘅計劃。

1983314號,由胡應湘創辦嘅香港合和實業有限公司同深圳經濟特區發展公司,正式簽合同落實興建深圳聯檢大樓。19856月,聯檢大樓正式竣工,大樓共12層,旅客進出境分別由唔同樓層通過,各個通道嘅聯檢廳都可以完成海關、邊檢、商檢、衛生檢疫、動植物檢驗等所需嘅一切入境手續。聯檢大樓嘅南邊仲有一條300米長嘅雙層行人天橋,橫跨深圳河連接香港海關口岸,加上檢察櫃位嘅數量比以往增多,大大加快咗旅客嘅通關速度,宜家嘅聯檢大樓每日大概可疏通20萬出入境旅客。

圖片嚟自網絡。