對於香港人嚟講，除咗葡國雞之外，另一樣出名嘅澳門食物就係葡撻。葡撻同葡國雞唔同，葡撻係真係嚟自葡萄牙㗎！葡撻係喺19世紀嘅時候由里斯本一間修道院嘅修女發明，後來修道院關閉之後，就喺一間餅店果度開始有得賣。

之不過，今時今日澳門葡撻係同葡萄牙嘅葡撻係唔同嘅，咁係因為澳門葡撻係由英國人安德魯·史斗（Andrew Stow）喺上世紀八十年代尾帶到澳門，但佢將葡撻改為英式奶黃餡同埋減少糖嘅份量，佢仲開咗間餅店，就係好出名嘅「安德魯餅店」喇！至於另一間好出名嘅葡撻店「瑪嘉烈蛋撻店」就係由安德魯嘅太太瑪嘉烈同安德魯離婚之後開嘅。


至於安德魯定瑪嘉烈嘅葡撻邊間好食啲，就真係見仁見智，不過好似話某美式炸雞快餐店而家賣緊嘅葡撻就係用瑪嘉烈配方整嘅。