最近新聞成日報道巴士座位無啦啦有針，搞到乘客被拮傷，真係防不勝防。講開針，印象中有單案都同佢有關，話說係2007年3月，跑馬地馬場職員喺賽馬日巡查賽道嘅時候，發現1200米起跑點位置有一組遙控發射裝置，內藏20支鋼針同藥水嘅管狀發射器被人插喺草地下，管口對住12個閘口。警方之後確認「毒藥水」係獸醫常用嘅鎮靜劑，可以响極短時間內令啲馬肌肉鬆弛，四肢發軟倒地，分分鐘搞到騎師墮馬。居然有人夠膽响「地盤」搞搞震，馬會之後懸賞100萬，追緝毒針刺馬嘅狂徒。
警方調查後發現，有四個男人於事發前幾日去過賽道踩線，被馬會職員發現咗。隔咗兩日，佢哋再潛入去賽道，相信係嗰時放置遙控發射裝置。但到底係咩人要咁做呢？初時馬會同警方都相信，係有人想對馬匹施襲，令閘內嘅馬同騎師人仰馬翻，製造混亂，癱瘓賽事。不過後來警方進一步調查之後，就相信事件同外圍馬集團有關，有人試圖喺賽馬嘅時候向馬匹放毒針，影響馬匹出閘，從而影響賽果，令熱門馬匹無辦法贏出賽事，外圍馬集團就能從中獲利。