深圳係中國最早嘅經濟特區，呢層就好多人都知喇，但係大家又知唔知早响深圳成為經濟特區之前，就已經有一個地方率先做咗經濟改革同埋對外開放嘅試驗場？呢個地方就係深圳南頭半島東南部嘅蛇口喇。

話說開國上將葉飛响文革後期復出，喺1975年至1979年間出任交通部長，期間佢率團考察西歐回國之後，就決定喺深圳蛇口開發一個工業區，並派咗當時嘅交通部外事辦主任袁庚（原名歐陽汝山，寶安大鵬鎮人，憑住佢嘅大膽創新，重視人才、效率，喺蛇口工業區開創多個全國第一，所以有「蛇口工業區之父」之稱），去香港交通部屬下嘅香港招商局參與領導工作，同時葉飛仲爭取到中央政府嘅支持，批准興建蛇口工業區。就係咁，喺1979年1月31果日，中央決定成立蛇口工業區，蛇口成為新中國第一個外向型嘅經濟開發區。

「時間就係金錢，效率就係生命」，呢句係袁庚响改革開放早期傳遍海內外嘅名言。當時袁庚對蛇口工業區嘅管理可謂別樹一格，佢率先打破咗平均主義，實行超產獎勵制度，用嚟鼓勵區內員工嘅積極性同工作效率。喺當時「大鍋飯」盛行嘅年代，呢個獎勵制度引起相當大嘅爭議。另外，蛇口工業區開始進行住屋制度改革，實行職工住房商品化。同時又向中國人民銀行提交成立招商銀行嘅申請報告，最終招商銀行喺1987年4月8號成立，亦係中國首家由企業法人持股嘅全國性股份制商業銀行。1988年，平安保險喺蛇口開業，佢亦係新中國第一家由企業創辦嘅商業保險公司。而袁庚對蛇口工業區嘅貢獻，更加得到當時嘅國家領導人鄧小平嘅讚賞添。