近排睇返部舊戲《小活佛》（Little Buddha），又帶阿史神遊咗一次充滿宗教神秘色彩嘅加得滿都。同西藏隔咗成座喜馬拉雅山嘅尼泊爾，佢嘅首都加得滿都建於723年，係世界出名嘅旅遊景點之一。

响12世紀果陣，國王用一棵樹起咗一座塔廟——獨木廟（Kastha Mandap），加德滿都隨後就以呢座廟為中心，發展成宜家嘅城市，所以加得滿都喺尼泊爾語有「獨木廟」嘅意思。加得滿都城入面有超過2700座大小寺廟，令佢成為一座名副其實嘅「寺廟之城」。可惜2015年4月25號嘅一場7.9級大地震，令加德滿都好多寺廟（包括獨木廟）變成廢墟，就算宜家有啲修復咗，都唔係原先果個樣。所以，有想去遊覽嘅地方就要盡早去，唔係就可能只係靠望吓張相嚟懷緬。