廣東省有一個非物質文化遺產好獨特，係一個皇族嘅祭禮儀式嚟，佢就係趙氏家族祭禮儀式。阿史初初知果陣都覺得好不可思議，估唔到呢個儀式仲可以睇添。話說近呢兩年，珠海斗門舉辦咗個民俗文化節，其中一個重頭戲就係呢個趙氏家族祭禮儀式。

每逢春節、喜慶二事、春秋二祭，趙氏家族都會以呢個祭禮儀式嚟祭祀先人。就以上年文化節嘅儀式為例，個儀式嘅表演團隊喺南門村牌坊出發，一直巡遊到趙公祠嘅菉猗堂，儀式就係菉猗堂前面嘅廣場舉行。首先設祭壇，點香火，擺上豬牛羊三牲同其他祭祀品，跟住誦讀祝文：「雲山蒼蒼，江水湯湯，惟我祖德，山高水長。」然後由鑼鼓隊伍引路，著住各式漢服嘅演員魚貫入場，有旗手、舞姬、宮女、祭師、王爺、王妃、大臣等等。呢班由中學生飾演嘅演員依次表演咗宋代宮廷舞，叩首禮拜，研習經典。呢個係宋朝皇族趙氏嘅傳統祭祖儀式，一千幾年嚟靠口授相傳，直到2008年，南門村接霞莊趙德春用文字整理好，再由毓秀社趙承華修編，令成個儀式更加完整規範。點解佢地會咁熟個儀式？因為佢地都係宋魏王趙廷美（原名趙匡美，為避趙匡胤名諱而改名）嘅後人，趙德春同趙承華仲分別係趙廷美嘅第29、30代傳人添。唔講唔知，呢條南門村係趙氏嘅聚居地嚟㗎，有超過85%嘅村民都係趙廷美後人。

可以睇返宋朝果時嘅祭禮儀式係咩樣，阿史都有興趣去見識吓，睇吓今年有冇機會上珠海參加吓呢個民俗文化節先。