阿史最近上咗轉深圳，梗係問問當地朋友有咩特色好去處，對方竟然介紹阿史去版畫村。嘩！好文青。原來條版畫村係著名版畫家陳煙橋嘅故鄉，講起陳煙橋同版畫，就不得不提佢嘅師父——魯迅。魯迅係中國新興木刻運動之父，一共編印過多本木刻版畫選集，更培養出一批新版畫嘅拓荒者。

講返版畫村，條村位於深圳龍華區觀瀾，係客家古村落，以排屋形式呈現，依山傍水。古村嘅民居係清末民初所遺留，仲有幾棟雕樓，具有濃厚嘅南方民居特色，有人更讚佢係世外桃源。

版畫村內有唔少祠堂，都係以前歷代居民供奉祭祀祖先、家族議事嘅地方。响古代，祠堂有嚴格規定，唔好講話外姓人，連族入面嘅婦女或小朋友，平時都唔可以亂入，否則會受重罰。好似年頭播嘅電視劇《平安谷之詭谷傳說》入面，蘇玉華、龔嘉欣等女主角就不得踏入祠堂半步。而現今，版畫村大部分對外開放的祠堂已經成為旅遊觀賞的古蹟。

除咗祠堂，村入面仲介紹埋版畫嘅發展、種類、工具等內容。阿史對版畫認識唔深，睇嚟有機會要去參觀吓，見識見識。