每當提到改革開放政策，都會話深圳特區係「改革先鋒」。的確，深圳响八九十年代當年推出咗好多相當大膽同創新嘅政策，其中一個就係賣地喇！

1987年11月26日，深圳進行咗中華人民共和國立國以來第一次土地拍賣，被視為國家土地政策嘅一個重要改革。不過，呢次賣地只係拍賣土地嘅「使用權」，而唔係「擁有權」。咁點解深圳政府會賣地呢？原因就係等錢駛。有前深圳官員憶述，响八十年代要發展基建，開支好大，市政府煩緊點算，當時有一個港商就同班官講：「錢可以從土地中來」。呢班深圳官員覺得呢條橋有得諗，於是就組團去香港考察下情況，最後就促成咗拍賣土地呢個政策喇！之後各地就有樣學樣，各地政府都靠賣地增加收入。

响過咗好多年後，前深圳市委書記李灝先開名講呢位港商個名，佢就係霍英東。