戰爭有幾殘酷？張相可能係答案。1937年8月淞滬會戰（八一三會戰）期間，上海有大批難民諗住搭車返鄉下，大概有近兩千人於上海南站等緊車，點知日軍戰機多次飛至並且俯衝轟炸，報道話車站殘肢頭顱四散，血流滿地。

空襲之後，美國華裔攝影師王小亭見到鐵軌同月台上有多人傷亡，突然有個男人响軌道上抱起個無咗媽媽嘅嬰兒並放低响月台，然後走去救另外一人。當時王小亭聽到有另一架飛機飛近，佢即刻影低嬰兒喊到聲嘶力竭一刻，然後衝過去諗住齊齊走。最後bb嘅父親嚟到，抱住親生骨肉逃出生天。

張相後嚟於美國媒體刊登，引起美國甚至國際社會反響，紛紛譴責傷害無辜平民嘅行徑。有嚟自美國新澤西州嘅媽媽寄咗封信到中國，入面有三蚊美金同埋王小亭張相嘅剪報，寫明話自己三個女想每人捐一蚊畀相入面嘅苦命嬰兒。

圖片嚟自網絡。