喺1996年嘅8月，發生咗一宗家庭悲劇。女童阿秀嚟自一個破碎家庭，父母離異之後，法庭因為佢媽媽阿雲患有精神病，所以將阿秀嘅撫養權判咗俾爸爸朱培華。但朱培華本身係一位點心師傅，平時工作繁忙、早出晚歸，再加上佢已經另組家庭，於是平日都會將阿秀交俾前妻阿雲照顧，直至週末先接返個女。喺1996年嘅8月18日，朱培華如常咁將阿秀交俾阿雲照顧，點知呢日之後再聯絡唔到阿雲同阿秀兩母女。

當時朱培華報警求助，但因為證明唔到阿秀失蹤，於是警方就未有理會。到咗9月2日，學校打電話俾朱培華，話阿秀無返學，朱培華就再次報警，朱培華同警方去到阿雲位於元朗橫洲東頭圍嘅屋企睇下，就發現一張元朗泥圍村屋嘅租單，同一本拍紙簿，寫住「粉嶺馬尾下簡頭村四十八號」呢個地址。朱培華去兩個地址搵過，泥圍村屋就見唔到有人，簡頭村就搵唔到邊間。

去到第二日，朱培華就收深圳羅湖醫院嘅電話，話阿雲食咗過量安眠藥昏迷，朱培華隨即去到醫院，向阿雲追問個女嘅下落，但阿雲唔肯講，朱培華喺前妻隨身物品搵到條鎖匙，朱培華返到香港之後，喺兩個記者陪同下，再到簡頭村搵，三人喺簡頭村搵咗個幾鐘後，得到一名女村民幫助，終於搵到間屋，最後喺雪櫃入面搵返阿秀。而蜷縮喺雪櫃入面嘅阿秀塊面白晒、左眼凸出、右眼凹入，死唔眼閉。朱培華見到阿秀被殺，非常自責，怪責自己唔應該交個女俾阿雲照顧。

悲慘嘅童年、破裂嘅婚姻令阿雲精神狀態唔好，加上生咗女後患上產後抑鬱，令阿雲有精神病。佢事後供認，自己想同阿秀一齊自殺，所以喺深圳買咗大批安眠藥，趁阿秀病咗，就氹佢食安眠藥，阿秀當時食咗40粒安眠藥，第二日阿雲發現阿秀仲未死，就將阿秀個頭撳入水盆度，浸死佢。呢單案件，法官最後接納精神科醫生建議，將阿雲輕判入小欖精神病院兩年。餘生，佢只能於自責中度過。