白底藍邊嘅紗麗係德蘭修女嘅標誌同象徵，佢落力照顧貧苦病患，1979年更獲得諾貝爾和平獎。奉獻一生嘅德蘭修女，於21年前嘅今日响加爾各答逝世。天主教教宗方濟各其後於2016年冊封德蘭修女為聖人，當時有成十萬人到梵蒂岡見證。

德蘭修女係阿爾巴尼亞裔，1910年於依家馬其頓首都嘅斯科普里出世，18歲嗰時，佢決定成為傳教士，更加為學習英文而加入愛爾蘭嘅修女會，自此之後無再見過家人。幾年之後，佢宣誓成為修女，改名為德蘭修女。1940年代，德蘭修女離開教會，為窮人提供協助。佢1948年响加爾各答展開慈善工作，多年嚟嘅努力獲得多方肯定。而德蘭修女身穿嘅藍邊白底紗麗，據說係她獲准响加爾各答貧民窟工作嗰日嘅傍晚，响當地市場購買，後嚟更加成為佢創立嘅仁愛傳教會嘅服裝。

鄭秀文九十年代有首歌叫做《加爾各答的天使》，由林振強填詞，核心內容正正就是講德蘭修女嘅貢獻。德蘭修女生前曾經講過，如果有一日佢被封聖人，自己肯定係黑暗嘅一個，「我將長時間於天堂缺席，為地上活在黑暗中嘅人燃點亮光。」

圖片嚟自網絡。