細個中意睇叮噹，貪佢生活化得嚟又充滿幻想，主角之一、嚟自未來嘅叮噹，之前一直都係由無綫配音員林保全聲演，仲配足三十年，成為一代人心中嘅回憶。

保全叔七十年代初寫信到無綫，自薦做配音員，1978年首次為叮噹配音。其實日本嘅叮噹係由女聲配音，所以保全叔為叮噹度身訂造把聲時，專登提高把聲，希望同日本嘅原著更加神似。

1992年保全叔曾經跳槽過亞視幫日劇配音，所以TVB嘅叮噹變咗另一把聲，搞到有觀眾投訴，要求回歸「原聲」，可見保全叔把聲幾咁深入民心。其實除咗叮噹外，保全叔曾為《IQ博士》、《足球小將》、《聖鬥士星矢》、《機動戰士高達》等多套經典日本卡通配音，仲係演員洪金寶嘅御用配音員。

保全叔生前透露，屋企收藏超過300隻叮噹，連佢自己戴嘅錶同工作證套都有叮噹嘜頭，兩者已經結下不解緣。保全叔幾年前走咗之後，叮噹，即係《多啦A夢》改由80後嘅女配音員接棒，變為女聲。

圖片嚟自網絡。