喺50年代尾,香港發生咗單轟動一時嘅「三狼案」,而案中死者之一嘅黃應求,就係而家足球評述員黃興桂嘅爸爸。

案件始於1959年6月18日夜晚,當時富商黃錫彬個仔黃應求同朋友出去食宵夜,之後各自離開,黃應求自此失蹤。三日之後,黃錫彬喺屋企收到一個包裹,裝住一對人耳、一啲黃應求嘅隨身物品同埋一封署名為「野狼」嘅勒索信。黃家確認人耳係屬於黃應求,但黃錫彬就拒絕交贖金,結果再無任何消息。

到咗1961年2月10日,輪到爸爸黃錫彬被綁架,黃家再收到勒索信,而今次署名又係「野狼」,今次黃家就肯俾贖金,黃錫彬侄仔黃應機同黃應禧兩兄弟按照綁匪要求,將贖金放喺指定地方,最後黃錫彬被綁架17日之後獲釋。

爸爸黃錫彬無事,但黃應求就一直失蹤,直至1961年12月10日,警方根據一個被追殺嘅人——「蛇仔明」鄧偉明提供嘅線索,喺香港島淺水灣道一個山坡上挖掘出黃應求嘅屍體。原來蛇仔明有份綁架黃應求,不過因為同其他綁匪分贓唔勻,於是向警方爆大鑊,講出黃應求係因為逃走失敗而被滅口。警方之後捉咗3名綁匪,包括無業嘅李渭、教車師傅倪秉堅同電影化妝師馬廣燦,佢哋三個被稱為「三狼」,最後喺蛇仔明指證下,「三狼」被判環首死刑,並於1962年11月28日執行。而蛇仔明就因為做污點證人,被判監15年。

呢單案後嚟就被搬上大銀幕,拍成電影《三狼奇案》,由鄭則仕、梁家輝同徐錦江飾演三狼。

原圖嚟自網絡。