最近美國總統特朗普承認耶路撒冷係以色列首都,仲命令將美駐以大使館遷往耶路撒冷。呢件事令到中東局勢馬上升溫。之前阿史仲以為史友們對中東國家嘅歷史無乜興趣,不過有唔少史友都要求介紹多啲,加上巴勒斯坦係參與一帶一路倡議嘅國家,咁當然無問題啦!

以色列、巴勒斯坦以及耶路撒冷地位問題等,可以有好多嘢可以講,當然慢慢講啦!今次就先講講,以巴衝突嘅起源。可能大家都會聽過,依家以色列同巴勒斯坦地區响古代係猶太人生活嘅地區,後嚟猶太人流散到世界各地生活,而原來地區先後由拜占庭帝國、馬木留克王朝、奥斯曼帝國等勢力控制。响十六世紀,奥斯曼帝國佔領呢個地區,一直至第一次世界大戰後,呢個地區就由英國所控制。

而响十九世紀末,唔少流亡海外嘅猶太人就試圖返去巴勒斯坦地區生活,購買土地落地生根,但佢哋嘅出現就引起當地阿拉伯人嘅不滿。十九世紀末,錫安主義興起,號召猶太人返去故土復國,結果出現咗幾次猶太人回歸潮。

响1920年,國際聯盟委託英國管轄巴勒斯坦,英國就將託管地劃分為兩部分:東部為阿拉伯人居住地,西部為猶太居民區。不過,隨著愈嚟愈多猶太人回歸,猶太人同阿拉伯人關係愈嚟愈緊張。二戰後,聯合國大會响1947年決議以將巴勒斯坦地區再分為以色列同巴勒斯坦兩個國家,1948年以色列國正式宣佈成立。


之不過,呢個決議激發咗以色列同阿拉伯地區國家嘅衝突,結果爆發咗第一次中東戰爭。最終以軍打贏咗阿拉伯聯軍,佔領巴勒斯坦總面積八成領土,導致96萬巴勒斯坦人無家可歸,淪為難民。自此,以巴之間以及以色列同其他阿拉伯國家嘅糾紛,到今日都未能解決。