尋日講到當年亞視落重本製作嘅《百萬富翁》,成功撼低TVB同時段播出嘅《全線大搜查》、《機靈小子》,甚至連王牌選美節目《香港小姐》都鎩羽而歸,逼到TVB要急急腳向英國BBC 重金買咗《Weakest Link》嘅版權,再派大將DoDo姐鄭裕玲主持,製作成《一筆Out消》嚟對撼。

《一筆Out消》嘅遊戲規則比《百萬富翁》複雜,雖然同係以知識問答為主,但答問題嘅難度增加,非但無選項,參賽者思考嘅時間極短之餘,仲要分分鐘被其他參賽者投票出局,得到鄭裕玲一句:「你係眾望所歸、冇得留低。你要一筆OUT消,Goodbye」,最後一個仙都拎唔走。《一筆Out消》嘅遊戲難度比《百萬富翁》大咁多,獎金方面自然有加倍,一集最高嘅獎金可以高達300萬!不過前提係要你啲對手夠醒目,答啱晒所有問題,有累積獎金之餘,仲要你留到最後,無俾人out走。節目播出嘅頭6集,都有BBC高層「監場」,所以《一筆Out消》前期抄足原版,上至燈光佈景玩法,下至觀眾衣著顏色,甚至連主持人黑口黑面嘅風格都學到十足。 

不過,呢種搬字過紙嘅節目形式,觀眾似乎唔多受落,TVB甚至收到觀眾投訴話鄭裕玲嘅主持方式令人反感。再睇返收視,首集《一筆Out消》以平均收視27點稍勝《百萬富翁》嘅24 點 。但到咗第二集,《一筆Out消》嘅收視就跌到21點,比《百萬富翁》低8點。後嚟唔知係咪屈服於輿論壓力,鄭裕玲間中都會笑笑口咁鼓勵參賽者,收視率亦有輕微上升,不過依然無辦法完敗《百萬富翁》。

網上圖片