之前提到梅艷芳嘅電影作品《胭脂扣》,今日同大家講講另一位主角、哥哥張國榮嘅經典電影《霸王別姬》。依套戲曾經被《時代》雜誌評為全球百大不朽電影之一,更被譽為張國榮嘅巔峰之作。

《霸王別姬》改變自李碧華嘅同名小說,由張國榮飾演成日扮演京劇角色虞姬嘅程蝶衣,而師兄段小樓兼飾演霸王嘅演員就係張豐毅。後嚟程蝶衣假戲真做,中意咗自己師兄,歷經過戰亂、文革後,程蝶衣演完最後一次《霸王別姬》,自殺收場。

話說當年陳凱歌响東方文華邀請哥哥拍戲,因為劇本仲未完成,陳凱歌只能靠把口介紹套戲嘅內容,佢一邊講,安靜嘅張國榮一邊食煙,間唔中望望佢。當時陳凱歌有啲不安,唔知張國榮適唔適合同應唔應承,後嚟傾咗一陣,張國榮企起身同陳凱歌握手,「多謝你為我講嘅故事,我就是程蝶衣。」哥哥拍板答應演出,造就出經典嘅誕生。

好多資料都講過,與開機拍攝之前,張國榮從未接觸過京劇,佢一到北京,就即刻向京劇演員取經,苦練唱腔、造手同普通話。有報道提到少少幕後花絮,話當時有唔少粉絲收到風,趕去張國榮排練同拍攝嘅場地,甚至等通宵。而片場同餐廳嘅距離大約600米,張國榮為咗唔受干擾咁去食飯,佢著住戲入面虞姬嘅戲服行頭,用部份頭髮遮住塊面,當係練習咁邊行邊唸台詞兼甩水袖,又扭埋腰行碎步,安然度過依段食飯之路,傍住佢嘅製片人同老師等就緊張到心肝仔卜卜跳。好笑嘅係,啲粉絲以為嗰位行過嘅人有問題,完全唔知心心念念之人就在眼前。

圖片嚟自網絡。