鐘樓係尖沙咀地標之一，唔經唔覺原來佢已經退咗休成43年。鐘樓於1915年建成，係九廣鐵路總站嘅一部份，而成座車站就响1916年3月正式啟用。有古典復興建築風格嘅鐘樓高四十四米，樓頂有支七米高嘅避雷針。唔講唔知，鐘樓內原本有座青銅大鐘，而且得一個鐘面，去到1921年先出現四面嘅報時大鐘。

1975年11月30日，總站由尖沙咀搬咗去紅磡火車站，一直用到依家，而舊車站於三年後拆卸，用嚟興建太空館同文化中心，不過鐘樓就有得留低，成為香港不可或缺嘅建築代表。

圖片嚟自網絡。