彈丸之地香港，係精深博大嘅中華武術薈萃之地。武術發展從清末民初至今，已有超過100年歷史，可謂根深蒂固。其實「武術」一詞，於中國歷代文獻中亦被稱為「武藝」、「技擊」、「國術」及「功夫」等。當中「武藝」與「技擊」都表示赤手空拳同使用器械嘅搏擊技術；而「功夫」(kung fu)一詞，係响1970年代，香港興起拳腳武打電影同埋李小龍嘅徒手格鬥後，先至被國際普遍認識。今日就同大家對中華武術响香港嘅源流發展以至未來路向，做少少回顧與前瞻。

香港早於清末民初已有北方拳師南下授武，包括名震武林嘅「五虎下江南」；加上南派功夫亦响本地紥根繁衍，例如「東江三虎」及「洪拳雙傑」等，形成南北武術於香港共冶一爐。香港因地緣關係同政治因素而獨善其身，仍以傳統武術為發展軸心，對於宏揚國粹，保育文化，可以話係意義重大。

香港絕對算得上人傑地靈，唔少世界武術名家都响本地打出名堂，好似李小龍、黃飛鴻、葉問、成龍等。除咗佢哋，仲有鮮為人知嘅「幕後功臣」，佢哋從事動作電影指導同拍攝，成就震驚荷里活同國際影壇，好比袁和平、吳宇森、徐克、劉家良等。而部份於銀幕前後創造輝煌事業，但鮮有授徒嘅武術大行家如關德興、石堅、戚冠軍、洪金寶等，都係值得尊崇嘅前輩。

中華武術源遠流長，繁衍深廣，對中國以外嘅東方武術影響至大，就如日本嘅空手道及柔道，韓國嘅跆拳道及合氣道等。而中國功夫電影對西方動作片嘅啟蒙亦有跡可尋，譬如電影《功夫熊貓》（Kung Fu Panda），至今已經製作咗三集，成功將中國文化放諸國際視野上。另一荷里活經典製作《21世紀殺人網絡》(The Matrix)，由本港著名武術指導袁和平擔任動作設計，亦令中國功夫於西方影壇大放異彩。

講咗咁耐，其實主要係希望喚起社會嘅覺醒同重視，全面審視及保育依項歷史悠久、影響深遠嘅世界非物質文化遺產。廣義嚟講，將香港建構成為「中華武術之都」，亦有助促進本土旅遊，創造就業，強化經濟。

左起為經典武俠演員曹達華、于素秋、關德興、石堅。