電視劇《是咁的，法官閣下》講到一單斬首肢解嘅弒父殺母案，除咗件案嘅原型、2013年嘅大角咀肢解父母案，其實葵涌石籬邨10年前同樣發生過斬首案，死者係只有19歲嘅少女阿怡，而兇手就係佢25歲嘅前男友百鳴。因為一個情字，一個賠上性命，一個犯下大錯，難道愛嘅反面，只係得恨？

話說，阿怡同百鳴案發前一年喺青衣灝景灣會所工作認識，之後好快墮入愛河，並且同居。但拍拖9個月之後，阿怡就因為性格不合同男方分手，搬返去石籬邨同媽媽、家姐住，並且轉咗去另一間物業管理公司做嘢。不過百鳴就一直苦纏，案發前一晚更上咗阿怡石籬邨嘅屋企要求復合，阿怡屋企人報警，警員到場之後百鳴先離開。

結果去到第二日，即係案發當日朝早，當時阿怡屋企人都出晒去，百鳴就上門箍煲。佢見到阿怡唔肯開門，情緒就越嚟越激動，仲係咁拍門。阿怡驚滋擾到鄰居，於是就開門俾佢入屋，不過依舊企硬，拒絕復合，百鳴呢個時候居然拎出軍刀同生果刀，係咁斬自己嘅心上人。阿怡倒地之後，百鳴發晒狂係咁斬，最後一手執住阿怡嘅頭髮，另一手用刀鋸甩阿怡個頭。

據講，百鳴當時諗住用軍刀肢解屍體同毀屍滅迹，但佢冷靜落嚟之後就放棄，向一名友人講咗件事，友人大驚之後報警，警方趕到現場拘捕百鳴，佢最後被裁定謀殺罪成，被判終身監禁。

呢單案仲有段小插曲，當時仵工奉召到場將遺體移送殮房，遺體抬上黑箱車之後，架車竟然撻唔著，結果要叫另一架黑箱車嚟，當時班仵工都覺得相當之邪。而案發單位變成兇宅之後，有姓劉嘅家庭申請特快編配公屋，因為兩夫妻都信基督教，一於「無有怕」大膽入住，仲無換到留案發時染晒血嘅地磚添，唔通真係「信則有不信則無」？