清朝末年，中國於鴉片戰爭中輸畀英國，葡萄牙就乘機侵佔澳門。列強環伺之下，清政府喺1887年12月同葡萄牙簽署不平等條約——《中葡會議草約》及《中葡和好通商條約》，葡萄牙從此攞到「永駐管理權」，令同香港隔海相望嘅澳門，淪為殖民地，不過值得留意嘅係，條約並無將澳門割讓。

葡萄牙死心不息，1930年頒布《殖民地法案》，竟然單方面將澳門劃為葡萄牙領土「不可分割的一部份」。當時共產黨同國民黨喺度內戰，無暇顧及澳門。1949年新中國成立之後，葡萄牙將澳門嘅所屬權作為應承同中國建交嘅籌碼，想吞併澳門。1952年，葡國士兵於內地同澳門接壤嘅關閘，同解放軍發生沖突，葡軍率先開槍，雙方交火兩日，互有死傷。中方派人前往澳門交涉，要求葡萄牙負全部責任，但被拒絕。同年8月，中方宣布封閉關閘通道，停止向澳門供應食物等生活必需品。20日之後，澳葡當局就支持唔住，答應中方條件。

事件發生幾年之後，葡萄牙依然唔死心，打算喺1955年喺澳門舉行慶典、整返個紀念碑、發行紀念郵票等活動，紀念澳門成為葡萄牙殖民地400周年，可以話係變相向中國「示威」。不過葡國政府接到時任總理周恩來關於慶典活動嘅備忘錄，又面對澳門居民嘅強烈反對，最終被逼取消紀念活動、炸毀已起好嘅紀念碑。

去到1987年中葡簽署《關於澳門問題的聯合聲明》、列明澳門於1999年回歸中國之前，兩國仲經歷咗一番外交上嘅較量同博弈，有機會下次再講講。

圖為1880年嘅澳門，來源：Dennis G. Crow Ltd.