唔知大家有無去過西安睇秦始皇兵馬俑？阿史早幾年去過一次，第一次睇都真係幾震撼吓，其實兵馬俑原本係彩色嘅，只不過一接觸空氣就褪晒色，後人無緣得見，認真可惜，而點樣保護文物嘅難題，亦令專家至今都未敢貿然全面發掘秦始皇陵。

除咗兵馬俑外，秦始皇仲有幾千隻動物陪葬，例如雞、羊、天鵝等，簡直好似個動物園咁。據考古證實，秦朝人至少已經對超過十種動物加以利用，包括具有戰爭用途嘅馬、狩獵嘅鹿同麂、用嚟食嘅家禽同魚鱉，再到裝飾用途嘅蚌貝等。咁多種陪葬動物入面，以馬嘅數量最多，包括陶馬、銅馬同真馬，出土嘅「馬」當中，以銅車馬嘅手工最為精湛同神秘。

出土嘅銅車馬係按照秦始皇御用車隊中屬車嘅二分之一嘅比例製成，車蓋同車與內外都繪有精美嘅花紋。一號銅車嘅除咗可以遮風擋雨之外，仲可以隨住車身同太陽嘅轉動而自由旋轉180度，據講呢把傘嘅傘柄係歷史上最早嘅暗鎖装置、第一把子母加雙銷釘扣、世界上最早嘅齒輪装置，認真巴閉。二號車係帶有篷蓋嘅豪華車，車輿上嘅大篷蓋唔單止將車輿全部罩住，連車輿前邊嘅「駕駛室」都遮蓋到，形成封閉式嘅空間。車嘅兩邊車窗可以推拉，窗上面有好多細孔，咁嘅設計令車廂保溫、通風之餘，又可以令車裡面嘅人睇到窗外景致，心思方面一啲都唔比宜家嘅車遜色。至於點解秦朝果陣就已經有咁精湛嘅製車技術，到宜家都係專家們努力研究嘅課題之一。

圖為一號及二號車，以及車傘柄。圖片嚟自秦始皇帝陵博物院網站。