大文豪蘇東坡嘅「日啖荔枝三百顆,不辭長作嶺南人」,以及唐代杜牧嘅「一騎紅塵妃子笑,無人知是荔枝來」等詩詞歌賦,都顯示依種產自南方嘅水果,從古到今都好受歡迎。去到現代,嶺南最出名嘅品種增城掛綠更曾經創出單粒55.5萬元人民幣拍出嘅天價,抵唔抵真係食嗰個先知。

荔枝品種好多,包括糯米糍、妃子笑、掛綠等等,而「筆村糯米糍」、「增城掛綠」同「羅崗桂味」被稱為荔枝三傑,當中廣州增城出產嘅掛綠好矜貴,响古代已經被列為朝廷貢品。增城掛綠爽脆清甜兼多汁,果肉呈現半透明嘅凝脂狀,《廣東新語》形容掛綠「爽脆如梨,漿液不見,去殼懷之,三日不變。」要數嶺南最出名嘅荔枝,增城掛綠可以話係當仁不讓。

掛綠荔枝因為外殼紅中帶綠,好似被條綠帶包住,因而得名。相傳八仙過海中嘅何仙姑係增城人,15歲時獲仙人指點而學識法術,之後18歲被家人逼婚,佢趁家人唔察覺,就飛身到羅浮山成仙。何仙姑得道後,對家鄉嘅荔枝念念不忘,有次返到鄉下,坐响荔枝樹上織腰帶,離開時留低一條綠色絲線,纏响粒荔枝之上,所以大家見到紅中帶綠嘅荔枝,就取名為「掛綠」。

而根據文獻記載,掛綠已有四百多年歷史,據說係明代尚書湛若水去到福建荔枝之鄉楓亭,講荔枝核放入懷中,抱返家鄉增城,培育出荔枝品種「尚書懷」,亦即係掛綠嘅祖先。到乾隆年間,縣誌記載掛綠產於增城新塘四望崗,嘉慶年間百姓受到官吏騷擾,所以講啲掛綠荔枝樹全部斬曬,當中唯一「倖存者」,就是增城市掛綠廣場入面嘅掛綠荔枝母樹,令依種生果唔駛絕跡。

圖片嚟自網絡。