前排睇《樹大招風》講到「三大賊王」，戲入面陳小春飾演嘅卓子強（改編自悍匪「大富豪」張子強）為人大膽囂張，綁架完岳華個仔，仲走去岳華屋企唱K攞贖金。真正嘅張子強就梗係無咁誇張，但都唔講得小。

香港媒體報道，喺1996年5月，張子強同埋手下喺李嘉誠長子李澤鉅返屋企嘅時候綁架佢，期間仲有開槍添。有傳張子強當年將炸彈綁上身，單人匹馬走去李嘉誠屋企度攞贖金，一開口就話要20億，但李嘉誠手頭只得10億現金，最後因為要時間籌錢，就先後俾咗10.38億張子強。收到贖金之後，張子強就放咗李澤鉅，而李嘉誠亦都無報警，李嘉誠多年後提到呢次綁架，話當時張子強「拎咗咁多錢，下世都夠用」，勸對方攞完筆錢之後遠走高飛、洗心革面。

不過爛賭嘅張子強後嚟輸晒所得嘅贖金，跟手佢「食過翻尋味」，再喺1997年9月綁架當時係新鴻基地產主席嘅郭炳湘，郭家俾咗6億贖金，同樣無報警。1998年1月，警方喺馬草壟一間石屋搵到800斤炸藥，於是通緝張子強，而張子強就潛逃返內地，最後被公安拉咗，法院最後裁定佢非法買賣爆炸物罪成，判處死刑。佢同年12月被槍決，終年42歲。

原圖嚟自網絡。