2004年Boxing day，印尼蘇門答臘發生黎克特制9.1級強震，威力相當於2.3萬粒向廣島投下嘅原子彈，亦都係全球歷來第二強震。地震引發30米高海嘯，撲向印度、印尼、泰國、馬爾代夫等印度洋沿岸共13個國家，甚至波及非洲東岸，導致近三十萬人罹難。

有倖存者話震後地面瞬間沉降、裂開、升高兩三米，之後四周圍竟然出現土壤液化，湧動急速流動嘅泥濘，佢只能夠捉住一嚿瀝青，「漂流」1/4公里，期間見到呼叫嘅村民、屋同車等生命同建築，盡數捲入泥濘。

無數人喺天災中失去至親，包括住喺亞齊省、有一仔一女嘅杰瑪莉亞。杰瑪莉亞嘅老公於海嘯一刻，將7歲囝囝阿里夫同4歲囡囡詹納抱上塊木板度，點知小兄妹被海浪捲走，不知所終。災後杰瑪莉亞搵咗對仔女好耐，一直無消息，認為親生骨肉已經凶多吉少，於是成家搬離傷心地，去到蘇門答臘展開新生。

災後十年，杰瑪莉亞嘅哥哥有次返去亞齊省，見到有個放學嘅女仔好似詹納，打聽之下，先知道詹納當年被海嘯沖到偏遠島，得到漁民家庭收養，而阿里夫就下落不明。杰瑪莉亞同丈夫立即趕到當地同女兒相認，激動咁攬住個女嘅杰瑪莉亞話，「係神賜予嘅奇蹟！」

有咩比一個奇蹟更精彩？相信係另一個奇蹟。詹納同屋企人團圓嘅消息傳遍國際，有個店鋪老闆聯絡杰瑪莉亞，叫佢接返阿里夫。原來阿里夫被沖咗去蘇門答臘，當年瞓响一間店鋪外，得到老闆收留。而老闆後嚟响電視見到阿里夫嘅童年照，先知道阿里夫身世。歷劫十年，杰瑪莉亞一家人齊齊整整，大團圓結局。

細圖為杰瑪莉亞一家。網絡圖片