其實,利用鐵路通去其他國家,半個世紀前中國已經有,阿史今次想講下從北京至莫斯科嘅中俄國際列車。响1959年6月4日,從北京至烏蘭巴托及莫斯科嘅國際旅客列車正式開行,成為咗中國當時少數嘅國際聯運鐵路列車。有趣嘅係,由上世紀六十年代開始中蘇交惡,但係呢班車就無因而停駛。

講到呢班列車嘅故事,就唔可以唔提1993年發生嘅「中俄列車大劫案」。話說九十年代初蘇聯解體,國內經濟轉差,唔少俄羅斯人落草為寇。有一班賊就做呢班車做世界,20多個中國旅客被洗劫,呢單案搞到成為中俄之間嘅外交問題,據了解追捕工作至今仲未停止。

又講返呢程車,全程7000幾公里,運行橫貫歐亞大陸,途經蒙古同西伯利亞,車程需時係七日六夜。有幾個教過阿史嘅老師,就約埋試下坐呢班車。其中一個老師就話,坐完之後先感覺得俄羅斯國土係有幾大,真係大得好緊要。不過,試過七日車程後,佢哋返程時就決定都係坐飛機返北京算喇!

圖片來源:網絡