戰火硝煙雖已止息，但傷痛不應被遺忘。1937年12月13日嘅南京大屠殺中，超過三十萬人喪命。城內，日軍殺害手無寸鐵嘅平民百姓，包括老弱病殘，甚至嬰兒。刀刺、槍擊、趕入土坑活埋、淋汽油焚燒，日軍殺人嘅方式可以話係無所不用其極。瘋狂殺戮之下，南京城屍橫遍地。

日軍以殺人為「娛樂」，部份士兵先把平民嘅眼珠挖出或者割去耳朵，再槍殺佢哋，有士兵更將中國人當做靶，展開射擊同刺殺訓練。當年8歲嘅阿琴係大屠殺倖存者之一，當時幾十個日軍企响屋外面，道門一開，屋主就被殺。阿琴嘅爸爸即刻跪低，希望日軍放過家人，點知中槍喪命。阿琴媽媽嚇到抱住一歲嘅孻囡匿埋响枱底，但依然被拖出嚟，兩母女死於日軍刺刀之下。

至於阿琴同埋三個姊妹被公公婆婆收埋响隔離房，搵張被冚住。日軍闖入房，想強姦阿琴嘅兩個姐姐，公公婆婆响阻攔嘅過程中被打死。聽到姐姐淒厲嘅尖叫聲，張被入面嘅阿琴嚇到狂喊，被發現嘅結果，換嚟日軍刺向背脊嘅三刀。唔知過咗幾耐，阿琴終於醒咗，身邊只有同樣匿埋响被入面、喊到咩咁嘅4歲妹仍然生存。一家九口，只剩低兩個孤兒。

同樣於屠殺中倖存嘅仲有阿康，佢當時同埋成班村民被日軍圍圈綁埋一齊，殘忍嘅日軍居然向圈入面掟手榴彈，炸完再用刀捅殺村民，最後放火燒屋。阿康嘅耳仔、下頜、舌根被炸傷，條脷兩三年唔係好郁到，講嘢都講唔清楚。 有七個家人罹難嘅阿康，同阿琴以及唔少受害者一樣，成頭家於大屠殺中支離破碎，留下一生永不磨滅嘅傷痕同烙印。

原圖嚟自網絡。