是咁的,尋晚出街食完飯搭地鐵返歸之際,對面位有幾個靚女密密斟。去到油麻地站佢哋越講越大聲,阿史八卦一聽,原來佢哋討論緊少女跳軌嘅都市傳說。

話說1981年有架列車由中環開出,去到油麻地站嗰時,司機發現有個著住白色校服嘅少女跳軌,仲感覺到架車輾過個人添。咁大件事梗係即刻剎車同報警,不過離奇嘅係,地鐵公司將列車車卡吊起埋,兼搵過成條路軌,反轉個月台咁滯都搵唔到人,連血跡都無滴。總結多方報道,原來唔單止列車司機,連响月台等車嘅部份乘客都聲稱見到有少女跳軌。

究竟個少女去咗邊?唔少人紛紛猜測可能係司機眼花、遇上靈異事件,亦有心理學家話係成班人出現集體幻覺,可以話係眾說紛紜。而有樂觀嘅說法話,個少女响危急之際碌咗去列車同月台之間嘅空隙之中,後嚟仲自行爬返上月台,只不過大家無留意到咁話。

圖片嚟自網絡。