上個禮拜有單新聞，話喺何文田一幢大廈天台嘅水箱入面發現一具屬於女保安員屍體，令人聯想起幾年前美國發生嘅加拿大籍華人藍可兒事件。不過阿史今日就唔係諗住講藍可兒，而係早喺80年代，香港發生嘅一宗水箱藏屍案！

話說喺1985年，土瓜灣益豐大廈有住客投訴廁所沖水有問題，於是維修工人就上天台維修鹹水缸，期間見到箱底好似被人用混凝土整過，凹凸不平，一掘之下，居然發現人骨，從而揭發依宗碎屍案。警方追查後，確認人骨屬於嗰幢大廈五年前失蹤嘅住客鄧英傑，並查出案情。

案件發生喺1980年，鄧英傑當時睇上咗鄰居阿泰嘅大肚老婆，仲侵犯女方。阿泰於是搵鄧英傑算帳，期間兩個人大打出手，最後阿泰斬死咗鄧英傑。佢之後喺庭上解釋，話當時係鄧英傑先拎把18吋長嘅牛肉刀出嚟揮舞同指嚇在先，自己係出於自衛先將對方殺死，後嚟兩公婆太驚被人發現先碎屍，然後逐袋搬去天台水箱埋藏。陪審團接納咗佢呢個講法，法官判佢無罪釋放。而依單離奇案件，後嚟被改篇為電影《水箱藏屍》。

原圖為《水箱藏屍》劇照。網絡圖片