首宗「無屍命案」康怡烹夫案

記得上年有單「無屍命案」審訊，結果個被告罪成，判咗終身監禁，阿史就咁諗都覺得難舉證。不過其實呢單案並唔係香港第一單「無屍命案」，香港第一單嘅「無屍命案」要數到1988年2月嘅康怡烹夫案。

話說喺1988年，鰂魚涌康怡花園一個58歲姓馬嘅婦人，因為丈夫有外遇，同埋男方早前賣咗一個新界單位，但無將賣樓所得嘅款項同自己分，於是懷疑丈夫將啲錢俾晒情婦。馬婦就聯同細佬以及兩個男人扮入屋打劫，綁起個老公，要佢交出20萬，但被拒絕。個丈夫之後自己鬆綁，其中一隻手掙脫咗出嚟，馬婦驚丈夫報復會打佢，就拎起個煲扑丈夫。男方搶走個煲還擊，馬婦就喺廳拎起個鐵鎚係咁扑老公，扑到佢死為止。

馬婦殺人後用鋸碎屍，將屍塊用蒸糕點嘅大鋼煲煮熟，再分批棄置。馬婦曾經同親戚提起件事，對方之後報警。馬婦後嚟被捕，承認殺夫，當時距離兇案發生已經個幾月，屍塊難以尋回。不過馬婦講得出殺人、烹屍同棄屍細節，最後被判誤殺罪成，判入精神病院接受治療。直至1995年，醫生認為佢已經康復，最終獲釋。